El ‘Vasco’ renaz a los cien años. El profesor universitariu Francisco Erice, espertu na burguesía industrial asturiana, abre güei en Xixón un ciclu de conferencies consagráu a rescatar l’alcordanza del Ferrocarril Vasco-asturianu, que cellebra’l centenariu del so primer tramu de llinia, ente Uviéu y San Esteban.
Erice falará esta tarde de les rellaciones ente los burgueses qu’industrializaron Asturies nel sieglu XIX y los sos homólogos nel País Vascu, nuna conferencia que se cellebrará a les 19 hores na sala d’actividaes del Muséu’l Ferrocarril, en Xixón, y a la que van siguir charres del director del Muséu Vascu’l Ferrocarril, Juanjo Olaizola (23 de setiembre) y el responsable del equipamientu cultural xixonés, Javier Fernández (8 d’ochobre).
Tamién intervendrán nel ciclu los espertos María Fernanda Fernández, que falará el 22 d’ochobre de la Sociedá Hulleras del Turón; José María Flores, encargáu d’analizar el 12 de payares l’arquitectura de les estaciones del ‘Vasco’; y Germán Ojeda, quien pesllará’l ciclu de conferencies el 26 de payares con un análisis de la industria carbonera asturiana.
El Ferrocarril Vasco-asturianu, anguaño xestionáu por Feve, inaguró’l primeru de los sos tramos, ente Uviéu y San Esteban, el 2 d’agostu de 1904, y dos años depués algamó la llocalidá mierense de Figareo. La llinia penetró nel valle d’Ayer en 1935, hasta Col.lanzo, y afitóse como un preséu fundamental de la industrialización d’Asturies, n’estrencha vinculación a la salida al mar del carbón de la cuenca’l Caudal pal so tresporte posterior por barcu.