La selmana pasada, les llibreríes abríen -munches d’elles pola madrugada- con un nuevu títulu a la vienta, la última entrega de la saga de J.K. Rowling, con coles de siguidores ante les sos puertes.
Los amantes del mozu magu recibieron una segunda dosis del so universu cuando la productora estadounidense Warner Bross llanzó, hores dempués, l’últimu tráiler de la película ‘ Fantastic Beasts and Where to Find Them ’ y que supon la continuación del mundu de los muggles y los seres máxicos, anque con un nuevu protagonista.
Eddie Redmayne foi l’escoyíu pa encarnar a Newt Scamander, un viaxeru al que-y apasiona l’estudiu de les criatures máxiques y que yá foi presentáu na primer novela de la saga lliteraria, Harry Potter y la piedra filosofal, publicada en 1997.
Nel tráiler, les criatures frutu de la imaxinación de Rowling vuelven cobrar vida na Nueva York del sieglu XX. Scamander va vese envueltu nuna guerra de magos na que tendrá de faer frente a singulares besties y enemigos bien poderosos.
Rowling anunció’l pasáu mes de marzu que Fantastic Beasts and Where to Find Them va formar parte d’una triloxía. El filme va llegar a los cines el 19 de noviembre y, a diferencia de les entregues del neñu magu, el llibru de la hestoria -el guión, a última hora, de la película- va poner a la vienta un día dempués.