Un total de 25 mozos d’Avilés participaron anguaño nos intercambios xestionaos pola Oficina de Movilidá Xuvenil Internacional “Europa Equí”. Y esta selmana cuntaron les sos esperiencies nel Serviciu de Mocedá del Edificiu Fueru. Los viaxes desenvolviéronse en Cataluña, Finlandia, Alemaña y Avilés, n’estancies d’una selmana de duración.
Nesti alcuentru, otros mozos van poder conocer cómo s’entamen los intercambios nel marcu d’Erasmus+. Los ponentes van compartir semeyes, anécdotes y aprendizaxes para animar a otres persones a participar. Al rematar la charra, va haber un picotio con música y comida de los países nos que se realizaron les actividaes y nel actu taba presente la conceyala de Mocedá, Raquel Ruiz.
Nos intercambios, los distintos grupos, acompañaos por monitores, comparten esperiencies con mocedá d’otros países europeos y realicen talleres, exercicios, alderiques, simulaciones, teatralizaciones, actividaes al campu, ente otres. Estes esperiencies dexen a los mozos y mces desenvolver competencies, sensibilizase sobro temes sociales, afayar nueves cultures, costumes, según estilos de vida principalmente al traviés del aprendizaxe ente iguales.
Esti eventu entamase nel marcu de la sesta edición de los Erasmus Days que celebra la Unión Europea mientres los díes13, 14 y 15 d’ochobre pa promover los valores europeos, los beneficios de la movilidá, según dar visibilidá a les resultancies de los proyectos Erasmus+ a la ciudadanía, medios de comunicación y gobiernos. La Oficina de Movilidá Xuvenil Internacional “Europa Equí” xestiona beques de movilidá pa la mocedá d’Avilés dende l’añu 2006.