Est xueves 15 de marzu, a les 10 hores, fairáse la presentación del Diccionariu Etimolóxiu de la Llingua Asturiana (DELLA) del que ye autor el Dr. Xosé Lluís García Arias nun actu que va cuntar cola presencia del Rector y el Presidente de l’ALLA.
L’actu tendrá llugar nel Paraninfu de la Universidá d’Uviéu y nél participarán los responsables respeutivos de les instituciones qu’editen la obra: El Rector de la Universidá d’Uviéu, D. Santiago García Granda y el Presidente de l’Academia de la Llingua Asturiana, D. Xosé Antón González Riaño.
El Diccionariu Etimolóxiu de la Llingua Asturiana ye ensin dulda la obra científica de más altor rellacionada cola Llingua Asturiana y la so Filoloxía y marca’l finxu cimeru no que ye la descripción científica del idioma asturianu.
La conferencia central del actu fairála’l Dr. Michael Metzeltin (caderalgu de Filoloxía Románica de la Universidá de Viena) y ún de los máximos espertos mundiales nel estudiu de les llingües romániques.
L’ALLA, consciente de la importancia simbólica d’esta presentación, fai un brinde p’asistir a esti actu académicu a toles persones interesaes.