Portada Lliteratura Esther García López presenta “Faraguyas” nel Salón del Llibru Asturianu de Xixón

Esther García López presenta “Faraguyas” nel Salón del Llibru Asturianu de Xixón

by asturnet

La escritora Esther García López va presentar “Faraguyas”, unos de los sos últimos llibros, esti xueves a les siete y media la tarde na carpa instalada pol Gremiu d’Editores d’Asturies na cai Tomás y Valiente, xunto a la Plaza’l Parchís. El llibru asoleyólu la editorial Madú.

La obra de la escritora valdesana afonda na tradición del haiku xaponés, entregando una coleición d’ochenta poemes pequeños escritos na variante occidental del asturianu y acompañaos poles ilustraciones de Miguel Solís Santos.

El prologuista, Roberto González Quevedo, comenta del llibru que-y presta especialmente esti l.libru “porque Esther l.logra xunir la naturaleza ya la sensibilidá pa colos animales con un ritmu ya una cadencia especiales”. Pal académicu “Suenan en muitas páxinas estos haikus como música: paecen pentagramas nos que l’autora va reflexando en miniatura rel.lumos ya imáxenes. Pero nun son rel.lumos namás, sinón que detrás hai una especial sensibilidá ya comprensión del mundu que ta alredor de nós”.

Mañana vienres, Manolo Abad va presentar, nel mesmu marcu, el llibru “Vasos sucios en la madrugada”, editada por Septem.

Tamién te podria gustar