Esti día entamaron a esponese los trabayos del Concursu d’idees pa remodelar el paséu marítimu de Fomentu-Poniente mientres la Selmana Europea de la Movilidá nos Campinos de Begoña onde van poder vese hasta’l 30 de setiembre de 2021.
Por cuenta de la futura remodelación del paséu marítimu de Fomentu-Poniente, el Conceyu de Xixón convocó un concursu d’idees que pretende escoyer la meyor propuesta de diseñu urbanu y humanización d’esti ámbitu de la ciudá. Cerráu’l plazu de presentación de proyectos, almitiéronse finalmente 13 que van ser oxetu d’esposición mientres la Selmana Europea de la Movilidá.
Los ciudadanos y ciudadanes mayores de 16 años empadronaes en Xixón van poder manifestar la so preferencia ente los distintos proyectos almitíos a concursu, votando la propuesta que más valoren al traviés del Portal de Participación “Participa Xixón”. Cada persona va poder votar solamente por unu de los 13 proyectos almitíos nesta fase. La votación ciudadana va poder realizase del 23 al 30 de setiembre de 2021.