Esixen que’l presupuestu de los Premios Príncipe vaiga pa servicios sociales

Dende la formación política Conceyu Abiertu amosaron el so refugu a la celebración que cada añu se produz n’Uviéu con motivu de los Premios Príncipe d’Asturies, unos gallardones que, según consideren, “respuenden principalmente a una operación de llaváu de cara pa la institución monárquica, cada día más deteriorada nel conxuntu del estáu español”.

Amás, esti criteriu afecta según la formación especialmente a Asturies, yá que camienten que “se mos impunxo la institución del “Principado”, una figura política qu’entendemos respuende a valores arcaicos y antidemocráticos inherentes a la propia institución monárquica”. Dende Conceyu Abiertu quieren afitar qu’Asturies “nun ye un “Principáu”, nin el pueblu asturianu siervu o vasallu de nenguna figura que nun seya formada y participada pol propiu pueblu”.

Nesi sentíu, denuncien “la situación de probitú democrática na que s’atopa Asturies, con cientos de persones represaliaes nos caberos meses por distintos conflictos sociales y llaborales como puede ser el casu del mineru”.

“Y ye que nuna Asturies con 100.000 paraos y paraes, na que dende Xineru de 2011 tuvieron qu’emigrar 17.000 mozos y moces, na que perdemos miles d’habitantes al añu, nun país cada día más avieyáu y con menos perspeutives de futuru, nun podemos facer más que denunciar la política del “pan y circu” a la que dende les instituciones estatales, asturianes y municipales mos somorguien en toles ocasiones que pueden”, espliquen.

Consideren estos premios “una obscenidá y una burlla a la ciudadanía’l fastuosu despliegue de medios económicos y humanos, con sovenciones millonaries a una fundación qu’escapa al control públicu y que nun sabemos mui bien en qué emplega caún de los euros del pueblu que-yos apurren les instituciones”, recuerden. Por ello soliciten que se termien “cola marxinación y represión na que vemos sometida a la nuesa cultura, identidá, y a la nuesa llingua a la que contribuyen estos premios qu’en nengún casu tienen en cuenta los nuesos rasgos propios”.

Por toes estes razones Conceyu Abiertu ve necesaria una movilización lo más amplia posible, en númberu de participantes y en variedá d’aiciones, “pa denunciar la situación y amosar el refugu del nuesu pueblu pa con esta llaceria”.