Ésitu de la presentación del discu “Conceyo de Cantares”

El pasáu sábadu 19 de Xunu tuvo llugar la inauguración de la Temporada Braniza de 2010 nel Centru de Recréu de Folgueiróu (Eilao), cola apertura de la Piscina Municipal y de la Oficina de Turismu, y el conciertu de presentación del discu “Conceyo de Cantares”. Darréu, celebróse una churrascada y verbena col tríu “Nora”.

A les 20:00 hores, celebróse con un gran ésitu d’asistencia’l conciertu de presentación del CD “Conceyo de Cantares”, onde’l numberosu públicu tuvo oportunidá d’escuchar al dúu “Mestura”, la Bandina “Vos Altruaneiros” y el grupu folk “Tuenda”, que realizaron un repás de gran calidá artística pol repertoriu de pieces y cantares de la zona d’influencia del gallego-asturianu.

Esti conciertu, promovíu dende la Oficina de Coordinación Cultural y Llingüística del Parque Hestóricu del Navia, cola collaboración del Conceyu d’Eilao, inscríbese dientro de la promoción y conciertos de presentación del CD musical de cantares en gallego-asturianu “Conceyo de Cantares” que cuntó pa la so edición cola ayuda del Serviciu de Política Llingüística del Principáu d’Asturies.