Los cursos de branu de l’Academia de la Llingua inauguráronse esti llunes 1 en Santantolín d’Ibias, el llugar onde tien la sé esta escuela de formación llingüística. Un cursu elemental de llingua asturiana, otru avanzáu y dellos cursos d’afondamientu cultural y llingüísticu empobinaos a mayestros, xunta la primer fase d’un cursu de capacitación en gallego-asturianu son les ufiertes d’esta XXIII edición.
El cursu elemental de llingua asturiana ta abiertu pa toa clase d’alumnos, independientemente de la so formación y nivel d’estudios. Consta de sesenta hores lectives y el so oxetivu ye que los alumnos algamen el Certificáu Básicu de Conocencia de la Llingua Asturiana. Completar la formación del nivel elemental ye l’oxetivu del cursu avanzáu de llingua asturiana, tamién de sesenta hores lectives y empobináu a los alumnos que ya tienen la Certificación Básica de Conocencia.
Los cursos d’afondamientu cultural y llingüísticu van empobiaos al profesoráu que ya cuenta cola certificación afayadiza (la propia de l’Academia o les espedíes pola Universidá d’Uviéu) y tien como oxetivu el perfeccionamientu y reciclaxe llingüísticos y l’averamientu interdisciplinar a la realidá cultural asturiana.
Nesta edición de los cursos de branu de l’Academia va impartise per primer vez la Fase I d’un cursu de capacitación en gallego-asturianu, encamentáu a la institución llingüística pola Conseyería d’Educación y que forma parte del Programa Rexonal de Formación. El so oxetivu principal ye afondar n’aspectos teórico-prácticos del Gallego-Asturianu.
Los XXIII cursos de branu de l’Academia de la Llingua van desarrollase en Santantolín d’Ibias hasta’l prósimu 12 d’agostu.