Entamó la Uiquimaratón de Samartín del Rei Aurelio

Da-y presencia a la llingua asturiana nes nueves teunoloxíes ye ún de los aspeutos que más puen contribuyir a la so normalización y por esi motivu, y coinciendo col Día Internacional de la Llingua Materna que se celebra esti vienres 21 de febreru, la Oficina de Normalización Llingüística de Samartín del Rei Aurelio ta collaborando con un grupu de voluntarios de la Wikipedia n’asturianu (denomada Uiquipedia) pa llevar a cabu un taller esplicativu y una Uiquimaratón col envís d’enantar el númberu d’usuarios activos del proyeutu y aprovechar pa crear y ameyorar artículos enciclopédicos que tengan que ver col conceyu.

Ayeri xueves entamó l’actividá coles intervenciones de Gema Suárez Torre, conceyal de Cultura de Samartín del Rei Aurelio, y de Víctor Suárez y Xuacu Saturio, que llevaron a cabu la presentación del proyeutu Wikimedia y un taller d’edición na Uiquipedia. Güei vienres, de 6 a 9 de la tarde va tener llugar la Uiquimaratón na que los participantes van poder colgar artículos y semeyes rellacionaos con aquellos temes que más-yos interesen y que tengan que ver cola historia y el patrimoniu cultural de Samartín del Rei Aurelio. La Wikipedia ye una enciclopedia llibre caltenida pola Fundación Wikimedia, una organización ensin ánimu de llucru. Los sos más de 15 millones de artículos tán escritos collaborativamente por usuarios de tol mundu y los más de los mesmos puen ser editaos por cualesquier persona con accesu a internet. Creóse en 2001 por Jimmy Walles y Larry Sanger y anguaño ye la obra de referencia más grande y popular d’internet. La “Uiquipedia” ye la versión n’asturianu de la mesma, alcontrándose ente les más de 270 llingües que la componen y con un total de 19.400 artículos. Surdió en 2004, lo que quier dicir qu’esti añu va cumplir el so décimu aniversariu.

Siguen asina les actividaes previstes pa celebrar los cuatro años de la Casona del Bravial de Blimea como centru cultural, qu’entamaron el día 6 cola inauguración de la esposición “El Castiellu de Blimea. Historia, lleendes, abandonu”, que pue visitase hasta’l próximu 7 de marzu.