Como na primer edición, la Factoría Cultural vuelve participar na II Selmana Profesional del Arte d’Uviéu y va facelo cola instalación “Morfoloxíes Ocultes”, d’Avelino García Pérez. Ta teniendo llugar na Fábrica d’Armes de La Vega, dende güei 3 al 12 de xunu.
Un certame que s’inauguraba esti xueves 2 de xunu a les 18.30 hores, y nel que la Factoría participa cola obra d’un artista venceyáu como profesor en distintos talleres de la institución cultural d’Avilés, amás de como creador, en proyectos como “Modelando ilusiones” o diseñando’l puestu de la feria ABARGANO de Zaragoza.
Nesta ocasión, la instalación que propón l’artista nacíu en Cancienes consta de 300 pieces realizaes en lloza esmaltada, al traviés d’un procesu de fabricación en 26 moldes de tendalada de los que se reproducieron unes 350 pieces. Unos moldes que provienen de distintes tuberíes de PVC. Na so instalación, Avelino García quier reivindicar aquellos elementos populares que, pol so usu y material, pasen desapercibíos, ya inclusive nun primer momentu pasen por oxetos feos y puercos por cuenta del so contestu y usu habitual.
El tresformamientu que se consigue col apurra del material cerámico, y el so descontextualización, reflexa un gran potencial espresivu y estéticu, amás d’escultóricu, reciclando formes yá esistentes y tresformando el so discursu.
Nel procesu de producción participaron cinco alumnos y alumnes de práctiques de distintos centros: dos de la Escuela Cimera d’Arte d’Asturies d’Avilés, dos de la Escuela d’Arte d’Uviéu y unu de la Escuela Cimera de Cerámica de Talavera de la Reina. Amás, participó alumnáu y personal de la Fundación Vinjoy, según pertenecientes a la Factoría Cultural.