Redacción.
El XXVII Concursu de Canción Asturiana inclúi esti añu un apartáu dedicáu a una amuesa de teatru y monologuistes qu’entamó ayeri y va celebrase los próximos díes 24, 27, 28 y 30 de xunetu y el 2, 3 y 4 d’agostu. Güei va actuar el monologuista Jose Manuel Reguero López ‘El maestru’. Esti vienres va ser Manuel del Solo Leonardo ‘Nel del Sol’ quien actue y el sábadu Luzdivino Díaz González ‘Pin de La Cotolla’.
El llunes 30 de xunetu va actuar Fernando Fuertes Herrero y el xueves 2 d’agostu Luz Maria del Sol Díaz. El teatru va entamar el vienres 3 d’agostu cola Compañía Asturiana de Comedies, dirixida por Eladio Sánchez Sánchez.
El sábadu 4 vuelven los monólogos de la mano d’Avelino Fernández Álvarez “Velino’l Rilu’ y l’Amuesa va terminar el domingu 12 d’agostu cola entrega de premios del XXVII Concursu de Canción Asturiana cola interpretación de ‘La Vagancia de Cibiella’, un fragmentu d’El gallu la Quintana, por Luz María del Sol y Fernando Ruíz.