Entama en Ribeseya la 1er Selmana de les Lletres cola presencia de Xuan Xosé Sánchez Vicente

Ente güei, día 5, y l’8 de mayu, coincidiendo cola celebración institucional de la Selmana de les Lletres Asturianes, la Conceyalía de Cultura de Ribeseya va entamar la so 1er Selmana Ribeseyana de les Lletres, una selmana de conferencies onde van participar Xuan Xosé Sánchez Vicente, Inaciu Galán y Marta Mori d’Arriba, y onde amás, van conocese los ganadores de la primer edición del concursu de lliteratura erótica “Arbidel”. Tolos actos van celebrase na Casa Cultura de Ribeseya a les siete la tarde.

La selmana va entamar el llunes a les siete la tarde con una conferencia de Xuan Xosé Sánchez Vicente sobre la obra de María Teresa González, autora a la que se-y dedica la Selmana de les Lletres Asturianes esti añu.

El martes, la conferencia del día va tar al cargu del presentador del programa de la TPA “Al aldu: Xente de casa”, Inaciu Galán y González, que va falar precisamente de los medios de comunicación n’asturianu y de la so hestoria dende los años setenta hasta anguaño.

El miércoles va entregase’l Premiu Arbidel, un certame lliterariu convocáu pol Conceyu de Ribeseya y que tenía como motivu la lliteratura erótica en prosa. Nel actu van lleese les obres premiaes nesti concursu, que ye’l primeru n’asturianu que se convoca nesti conceyu del oriente.

La 1er Selmana Ribeseyana termina’l xueves con una conferencia de l’académica de la Llingua, Marta Mori d’Arriba, que va lleer la ponencia “L’asturianu güei: la situación d’una llingua”.