El pasáu vienres 13 tuvo llugar la segunda sesión de los talleres de llectura que se celebren esti mes nel conceyu de Samartín del Rei Aurelio con motivu de les XIV Xornaes de Lliteratura Infantil y Xuvenil.
Esta segunda sesión tuvo una dramatización como protagonista del taller: Depués de que na primer sesión los neños y neñes participantes s’atoparen una esposición sobre poesía asturiana estrozada por un misteriosu personaxe, el vienres confirmáronse les sospeches. Durante’l taller atopáronse con buelgues nel suelu, con misterioses solombres y hasta sintieron dalgunes rises. Too apunta a que tolo que ta pasando ye obra d’un trasgu nomáu Patarramplán, según apunten les investigaciones.
Dempués del estrozu de la esposición, los 21 neños y neñes participantes, d’ente 4 y 13 años, siguen trabayando na so reconstrucción, y ta prevista la inauguración de la nueva muestra pal día 27 de payares. El vienres terminaron de facer los caligrames qu’entamaren la selmana anterior y trabayaron na creación de nuevos poemes onde tuvieron que poner a prueba la so imaxinación y creatividá, too ello cola ayuda del escritor Pablo Rodríguez Medina y los monitores de Bocina Nalón.
