Emocionante despidida en Xixón pa Igor Medio y Carlos Redondo

Cientos de persones congregáronse ayeri nel tanatoriu municipal de Xixón pa despidir y homenaxear a los músicos de Felpeyu, Igor Medio y Carlos Redondo, muertos n’Àlava’l pasáu sábadu nun terrible accidente de coche cuando diben camín de Barcelona pa tocar nel Festival de Calaf. El panorama musical asturianu reconocía asina a dos de los grandes de la música , que foron despidíos polos acordes de los sos compañeros de profesión, colos que tanto y tan bien trabayaron na última decada.

L’actu civil que se celebró ayeri a la una la tarde nel tanatoriu municipal de Xixón vióse desbordáu pola asistencia de cientos de personalidaes de diferentes ámbitos de la política, la música y la cultura, asina como multitú de familiares, amigos y siguidores, que quixeron dar la última despidida a Igor Medio y Carlos Redondo.

A lo llargo del sentíu homenaxe, nel que tuvieron el restu de los componentes de Felpeyu, menos Xuan Nel Expósito que tovía s’alcontraba ingresáu nel hospital recuperándose de les sos mancadures, foron interpretaes n’honor de los fallecíos tres marches procesionales qu’arrespigaron y emocionaron a tolos presentes.

Prestixosos músicos de diferentes formaciones asturianes, axuntaos nuna bandina, foron interpretando la marcha de Belmonte y la de Llanes, dando pasu a les palabres de los amigos como Miguel Rojo, que fixo llectura de dos de los sos poemes. Tres d’el, Boni Ortiz, lletrista de Felpeyu y amigu íntimu de los desaparecíos, tuvo unes palabres de recuerdu a la trayectoria y vivencies personales de Medio y Redondo.

El filólogu Fernando Álvarez-Balbuena, amigu del grupu, fixo llectura de la canción ‘Tierra’, de la que ye autor, y que ye tou un símbolu na trayectoria de Felpeyu, al da-y nome a ún de los sos discos asina como al sellu discográficu que tiempu más tarde formaría Igor Medio.

L’actor Toño Caamaño faló en nome de les families de los fallecíos p’agradecer el tratu y la presencia de tolos asistentes y poles muestres de cariñu recibíes nos dos díes anteriores. Con un emocionáu ‘que la música continúe’, l’homenaxe a estos dos grandes artistes ya inolvidables persones acabó cola interpretación en solitario de Flavio Benito d’«Antón el Neñu».

Un emocionante homenaxe más que merecíu pa dos persones inolvidables que fixeron escuela y marcaron el camín na escena musical asturiana.

Igor Medio y Carlos Redondo muerren de madrugada nun accidente