” Elles, la hestoria de la princesa y la guerrera” proyéctase nun actu entamáu contra’l cáncer de mama nel salón d’actos del CMI d’El Cotu, ente los actos programaos por La Casa de la Vida y Synergy Clubes International.
Elles ye una guía de viaxe na que Virginia cunta la so propia esperiencia ensin dar llecciones nin marcar pautes; namá la hestoria de daquién qu’aprendió daqué del so viaxe y deseya compartilo. La hestoria d’una muyer que s’afaya a sigo mesma nun procesu bien duru. “Elles” son toles muyeres que viven dientro d’una muyer. Como si d’una muñeca rusa tratárase, la enfermedá va desatapando toes y cada una de les muyeres que nun pudieren amosase mientres la so sana vida, y que de sópitu, atopen el so sitiu. Ta la muyer que puede con tou, la que nun tien ganes de nada, la que sonri, la que llora, la que tien mieu, la que se siente inchente… Y toes faen qu’ella sía la muyer que ye. Ye una hestoria d’aceptación d’una mesma, un baille cola vida, un mirase de barganal y crecer.