Redacción.
L’Ayuntamientu de Quirós entama’l V Mercáu Quirosanu cola participación de mediu centenar d’artesanos del cueru, la cerámica, l’acebache, cesteros, etc. Veníos dende Asturies, Lleón y Galicia principalmente. El Mercáu cuenta tamien con dellos puestos de gastronomía y un chigre tradicional.
L’horariu va ser de les once la mañana a les once la nueche, lo mesmo’l sábadu que’l domingu. Nesi tiempu van facese talleres variaos pa los neños, teatru de cai col grupu ‘Amalgama’, actuaciones del grupu de Gaites ‘Teixo – Manolo Quirós’, escenes costumistes y paseos en carru’l país con gües pela zona.
El sábadu, a les siete la tarde, va tocar el grupu ‘La Bandina’l Tombo’ y la nueche va rematase col espectáculu de fueu ‘Cerámica en vivu’. El domingu dende les seis de la tarde, el ‘Club Deportivu 6 conceyos’ va facer una presentación de deportes tradicionales: corta de tronchos con hachu, carrera llecheres y otros. El V Mercáu Quirosanu va terminar el domingu con un conciertu de Vicente Díaz, el domingu a les ocho la tarde.