Un añu más l’asociación Reciella de families pol asturianu convoca’l Día de la Reciella, que cumple yá la so quinta edición y que va tener llugar nel Muséu del Pueblu d’Asturies esti domingu 1 d’ochobre.
Como tolos años l’oxetu d’esta xornada ye, sigún la organización, “poder pasar un día completu en familia nun espaciu y nun contestu nel que la música, los talleres, les actividaes ¡y hasta la comida! seya n’asturianu”.
El programa d’actividaes ye asemeyáu al que l’añu pasáu tuvo abondu éxito ente les families asturianes nel Muséu del Pueblu d’Asturies. La programación, entamará de xuru a les 11 la mañana y rematará sobro les 7 la tarde cola danza prima, siempre col asturianu como idioma vehicular.
Esti domingu 1 d’ochobre amás van a echa-y otra vuelta una carrera al tiempu y ganar una nueva xeneración pal asturianu, pasando’l testigu na II Entaína, una carrera popular na que puen participar les families, apuntándose nesti formulariu.
El percorríu ye bien cenciellu, pa que pueda con él tola familia, y va tener llugar nel Muséu del Pueblu d’Asturies, dientro de les actividaes entamaes pal V Día de la Reciella.