El tríu folk DRD tien el so segundu discu nes tiendes del país

L’Aguañaz, el sellu discográficu de Publicaciones Ámbitu, va sacar nos próximos díes el trabayu nuevu de DRD, el tríu de folk formáu por Borja Baragaño (flautes), Dolfu R. Fernández (voz, violín y viola) y Rubén Bada (guitarra, bouzuki y viola). El discu llámase tamién “DRD” y los títulos de cada cantar correspuende, según espliquen, “coles partes del molín”.

Esti ye’l segundu discu del grupu DRD, un tríu que según comenten dende la discográfica “sigue pela sienda del llamáu «folk de cámara» y onde s’axunten tres nomes bien conocíos de la música de raigón asturiana: Rubén Bada pertenez a la banda del gaiteru irlandés John McSherry, amás de ser miembru de Dixebra; Dolfu R. Fernández ye ún de los componentes de La Bandina’l Tombo, y Borja Baragaño, l’últimu n’incorporase al grupu, forma parte del grupu Llangres”.

Na so páxina web, Ámbitu ufierta la posibilidá de sentir el corte númberu 4 de DRD, «Raidoiru». Esta pieza ábrese col perconocíu «La farola de Tazones», a la que s’empata «L’amudar», un baille corríu del conceyu Degaña, y ciárrase con un saltón «a la manera de Rubén».