El Tribunal Cimeru obliga al Gobiernu d’Asturies a camudar la situación de los profesores de llingua asturiana

El Tribunal Cimeru ta acabante declarar nuna sentencia que la esistencia de “plantilles funcionales”, como tien incluyíos la Conseyería d’Educación a los profesores de llingua asturiana y gallego-asturianu, ye “contraria a derechu”, lo que supón que’l colectivu tendría de pasar por llei a formar parte de la “plantilla orgánica”, na que s’alcuentra’l restu del profesoráu.

Nesti casu, podría dase la necesidá de crear la especialidá de llingua asturiana nel cuerpu de maestros y de profesores de secundaria, lo que supondría que los aspirantes que superasen un procesu selectivu asemeyáu al de les otres especialidaes formaríen parte de la plantilla de funcionarios docentes, a diferencia d’anguaño, onde toles places se cubren con funcionarios interinos.

Pa SUATEA esta sentencia “trátase d’un pasu fundamental pa garantizar y dignificar la presencia de la nuestra llingua nel sistema educativu asturianu” anque denuncia “qu’en nengún momentu l’alministración facilitó nenguna información de cómo tien camentao aplicar la sentencia, nin los criterios que van siguir pa sacar les places d’asturianu”.

Mientres pa CC.OO “la normalización de la llingua debería pasar, amás de pola dotación de las places, pola creación de la especialidad de Llingua Asturiana y Gallego-Asturiano nos cuerpos de Maestros y Profesores d’Enseñanza Secundaria y pola convocatoria d’oposiciones, ufiertándose’l mayor númberu de places posibles, pa que los interinos de Llingua Asturiana puedan acceder a la función docente nes mesmes condiciones que’l restu d’especialidaes”.

Los maestros d’asturianu van aconceyar güei, 6 de febreru, a les siete la tarde, nel salón d’actos del IES Alfonso II d’Uviéu pa valorar les consecuencies d’esta sentencia.