El Tribunal Cimeru d’España anula la oficialidá del asturianu aprobada en 2001 nel conceyu de Nava

Según pudo conocese estos díes, el Tribunal Cimeru español, anuló definitivamente l’alcuerdu plenariu qu’en xunu de 2001 declaró la oficilidá del asturianu nel territoriu del Conceyu de Nava al traviés d’unes ordenances. El fallu ye firme y contra él yá nun hai recursos posibles. El Tribunal español ratifica asina la sentencia de 2005 del Tribunal Cimeru de Xusticia d’Asturias (TCXA) tres un recursu de la Delegación del Gobiernu español n’Asturies y escontra’l qu’Andecha Astur presentó un recursu de casación énte’l Tribunal Cimeru.

Les dos sentencies declaren nulu, “por nun ser conforme a derechu”, l’alcuerdu plenariu de 8 de xunu de 2001 nel que s’aprobaron les ordenances municipales sobre la oficialidá de la llingua.

Foi, nel so día, la Delegación del Gobiernu n’Asturies, en 2001 con Mercedes Fernández , del Partíu Popular, al frente, quien presentó un recursu contra l’alcuerdu plenariu.

El fallu del Cimeru afita la sentencia dictada pol TCXA solliñando “nun esiste nenguna declaración nel Estatutu d’Autonomía que disponga que’l bable tien el calter de llingua oficial n’Asturies”. El Tribunal recordó que “les corporaciones llocales carecen de competencia pa declarar la oficialidá d’una llingua, dientro o acullá de les llindes del conceyu”.

Daniel Cueli, voceru d’Andecha Astur en Nava, calificó la sentencia como “un actu represivu más”, amestando que “nun ye entendible que la equiparación de los drechos llingüíticos de los vecinos y vecines d’un conceyu seya illegal, que la igualdá seya illegal, que la democracia mesma seya illegal n’Asturies”.

P’Asturianistes por Nava’l fallu “desprotexe a la cultura asturiana y la llingua qu’usa ‘l pueblu”. El conceyal Emilio Ballesteros recordó que “l’asturianu nun ye un problema, porque ye como fala davezu la xente, pero decisiones d’esti calter son les qu’enquisten la situación y xeneren un problema alredor de la llingua”.

Dende’l PP, el voceru José María Osoro defendió la sentencia al recordar que si nun hai un Estatutu d’Autonomía que faiga referencia al asturianu, “un conceyu nun pue declarar la oficialidá”.

Les ordenances aprobaes en 2001 permitíen a los vecinos “relacionase col ayuntamientu n’asturianu o en castellán”, amás de recibir les notificaciones municipales nestes dos llingües.