El tercer númberu d’Erada ta yá nes llibreríes d’Asturies

La revista Erada, que tien por centru de los sos estudios la hestoria contemporanea d’Asturies torna a les llibreríes, nesti casu, de la mano de Suburbia Ediciones. Dirixida pol hestoriador Rafael R. Valdés, cambia d’editorial y de formatu esterior pero sigue calteniendo los mesmos criterios de calidá y distribución de conteníos, dedicando esti númberu a estudios sobre’l nacionalismu asturianu, dende estremaes perspectives.

Faustino Zapico trata “La campaña autonomista de 1897”, Cristóbal Ruitiña, periodista, analiza “La reaparición d’Asturies nos entamos d’opinión pública democrática nel tardofranquismu. La salida d’Asturias Semanal, 1969″, mientres qu’Armando Magadán fai repás a delles cuestiones de la hestoria del PAS n’”El Partíu asturianista, Asturianismu ya interclasismu como estratexa”.

Na estaya de Notes, l’hestoriador americanu Patrick Zimmerman asoleya “Reflexones sobre nacionalismu y historia viva: Nota d’un proyectu sobre la historia d’un nacionalismu frustráu”.

El volume cunta amás con reseñes d’Adolfo Cueto, sobre “Crónica de la Guerra de Marruecos”, Antonio Martínez, alredor de “Ni cautivos ni desarmados. Asturianos refugiados en Cataluña (1937-1939)”, Valentín Álvarez de “La Maginot cantábrica” y Guadalupe Valdés Rodríguez & María Jesús Villaverde Amieva sobre’l llibru editáu pola mor de la Selmana de les Lletres última: “Enriqueta González Rubín: el sinciu d’una escritora del XIX”.

Asturnews falaba va dos selmanes col director de la revista, que comentaba, ente otres cuestiones, que “Quiciabes seya tiempu d’entamar un foru sobre la hestoria del nacionalismu asturianu”.

Entevista completa a Rafa Valdés