El Campoamor acueye la clausura de les VIII Estancies Coreográfiques

El teatru Campoamor acueye esti vienres a les 20 hores la clausura de les VIII Estancies Coreográfiques con vestuariu ellaboráu por El Cordureru Eclécticu pa la pieza “13”.

El Campoamor acueye estos díes la octava edición de les denominaes Estancies Coreográfiques, entamaes pola Fundación Municipal de Cultura, so la dirección del coreógrafu asturianu Yoshua Cienfuegos. Nesti proyectu d’investigación sobro coreografía y danza participaron anguaño 31 persones de manera presencial y otros 20 investigadores de manera telemática pola mor del COVID. Nesta edición, qu’acoyó un añu más el teatru Campoamor, un alcuentru d’investigación interdisciplinar, participaron seis coreográfos de gran prestíu nacional.  Na gala de clausura que va tener llugar esti vienres a les 20 hores, que les sos entraes tán yá a disposición del públicu na web entraes.oviedo, va interpretase la pieza “13” .

La obra que s’interpreta esti vienres na gala de clausura, so la dirección de Yoshua Cienfuegos, tien como intérpretes a Maynor Chaves y Ariadna Llussá, a Rafa Damián como intérprete musical y con un diseñu de vestuariu executáu pol Cordureru Eclécticu. Mientres l’actuación interpretará música en directu específicamente creada pa esta pieza mientres les mesmes Estancies Coreográfiques. Tamién se va interpretar otra composición basada nes frases coreográfiques arrexuntaes nel procesu, con frases de casi tolos participantes y música compuesta ya interpretada por Giuliano Parisi, Vadim Yukhnevich y Rafa Damián.

El presidente de la Fundación Municipal de Cultura, José Luis Costillas, señaló que “esti programa realiza una importante llabor pal estudiu de la danza y pa consiguir ferramientes coles qu’enseñar esta materia y ameyorar la so divulgación. Mientres xunas selmanes, coreógrafos y baillarinos ponen de mancomún el so trabayu y el investigadores analicen aspeutos que pasen desapercibíos pal públicu polo xeneral y que van ayudar a poner en valor el trabayu d’estos profesionales”, señala’l conceyal.

Descarga les entraes equí