Los tradicionales alcuentros de Verines, qu’esti añu cumplen la so XX edición, van celebrase na casona de Pendueles los prósimos díes 15 y 16 de setiembre con más d’una trentena d’autores invitaos, que van teorizar alredor de ‘La herencia del Quixote y de Cervantes na lliteratura actual’. Ente los escritores participantes destaquen nomes como los de Jon Kortazar, Chantal Maillard, el gallegu Alfredo Conde y l’asturianu Xuan Bello.
El coordinador d’estos alcuentros, el profesor Luis García Jambrina, considera obligáu esti alderique, anque nesti casu l’enfoque nun va tratar de discutir directamente sobre la obra cervantina, sinón sobre la influencia que queda d’ella na lliteratura que se ta escribiendo anguaño.
Unos trenta participantes, ente escritores y críticos lliterarios, van tar concentraos na casona llanisca pa esponer les sos idees sobre esti tema. Jon Kortazar (miembru de l’Academia Vasca y catedráticu de Lliteratura na Universidá del País Vasco), Chantal Maillard (Premiu Nacional de poesía 2004), Juana Salabert (premiu Biblioteca Breve 2001), Joaquín Verdú (premiu Jaime Gil de Biedma), Antonio Orejudo (premiu Tigre Juan 1996), la catalana Ada Castells (autora de ‘El dedo del ángel’), el gallegu Alfredo Conde (autor de ‘Xa vai o Griffón no vento’, Premiu Nacional de Lliteratura) y Andres Ibáñez (autor de ‘La música del mundo’, premiu Ojo Crítico), son dalgunos de los participantes. Nesta edición solo va haber ún escritor asturianu, Xuan Bello (autor de ‘Paniceiros’ y de ‘La vida perdida’), que vien siendo un habitual d’estos alcuentros.
L’añu pasáu la edición tuvo dedicada a la poesía actual, escrita baxo’l signu de la pluralidá. Y ente los escritores que participaron, amás de Xuan Bello y Jon Kortazar, tuvieron Elena Medel, Kirmen Uribe y l’asturiana Esther Prieto.