El conseyeru de Xusticia y Esteriores del Principáu, Francisco José García Valledor y el presidente de la Federación d’Agrupaciones de Folklore Asturianu (FAFA), Ángel Herrera van firmar mañana un conveniu pal fomentu de la música y el baile tradicionales ente la emigración.
El documentu que va llevar la firma tamién del director de l’Axencia Asturiana d’Emigración, Luis Miguel Fernández Romero, quier valir pa ufiertar pontes de colaboración, apoyu y hermanamientu ente les agrupaciones folklóriques de l’Asturies interior y l’Asturies exterior.
La Conseyería d’Esteriores lleva a cabu dende la entrada en vigor del Plan Xeneral d’Emigración diversos programes de fomentu de la cultura asturiana ente les comunidaes d’emigrantes. Agora con esti conveniu ente l’administración autonómica y la Federación d’Agrupaciones de Folklore Asturianu va materializase una política de colaboración directa coles asociaciones dedicaes a la nuestra música y baile tradicionaels.