El Plan de Movilidá Urbana d’Avilés licitarase pala fin del mes, cuando los técnicos municipales tienen previsto peracabar l’adaptación de los pliegos técnicos a la nueva llei de Contratos del sector públicu. Ye unu de los proyectos con financiamientu de los Fondos Feder dientro de la Estratexa de Desenvolvimientu Urbanu Sostenible (EDUSI) de la ciudá.
La noticia súpose esti día darréu de les declaraciones del voceru del Gobiernu municipal, Luis Fernández Huerga, sobre’l desenvolvimientu de los proyectos municipales que cunten con financiamientu de los fondos FEDER de la Unión Europea, ente ellos el Plan de Movilidá Urbana Sostenible (PMUS) d’Avilés.
Luis Fernández dexó afitao que la execución de los Fondos Feder colos que’l Conceyu d’Avilés financia la so Estratexa de Desenvolvimientu Urbanu Sostenible (EDUSI) esixe un procedimientu d’execución y control más complexu que’l procedimientu alministrativu común y afitó tamién que “el Plan de Movilidá Urbana Sostenible (PMUS) d’Avilés ye unu proyectu de los presentaos por esti Conceyu al Programa Operativu de la EDUSI d’Avilés y la so llicitación ta prevista pa este mesmu mes, una vegada que los pliegos técnicos ellaboraos nel so momentu polos técnicos municipales afayeranse a la nueva Llei de Contratos”.