El Partíu Popular ve “insensato” qu’Asturies pida más financiación por tener una llingua propia

Nuna entrevista concedida por Joaquín Aréstegui al selmanariu Les Noticies, el políticu conservador aclarió la posición del Partíu Popular d’Asturies sobre la posibilidá de qu’Asturies se sumara a la petición del presidente Touriño, de más financiación por mor de la llingua propia de la so comunidá. Una petición que comparten delles fuercies nacionalistes d’Asturies, pero que pa Aréstegui ye “insensato”.

Una propuesta que-y paez “la primer tontería que se-y ocurre” al llíder gallegu. Pal popular esto ye “un disparate”, y añade “Madrid, entós, ¿va pidir más financiación por tener la llingua común?”.

P’Aréstegui “nun val querer preservar la llingua propia y depués pidir una sobrefinanciación”. Camienta que les comunidaes con llingua propia “yá tienen competencies sobre ello, yá reciben dineru por ello, y lo que tienen que facer ye racionalizalo”. Pal popular, lo contrario diba ser “como si los de La Rioja pidieran más perres porque ellí nació’l castellanu y argumentaren que gracies a ellos los españoles disponen d’una llingua común”.

El popular cree que la reforma de la financiación va facese “según el modelu qu’impriman los catalanes”, lo que “nun beneficia a los asturianos” y amás considera “absolutamente insolidariu”. Cree amás Aréstegui que “los socialistes asturianos nun tienen nenguna fuerza en Madrid” polo que sentencia “Asturies nun tien nengún pesu”.