El Partíu Carlista d’Asturies denuncia que nun-y dexen presentase col nome de la formación n’asturianu

El Partíu Carlista d’Asturies emitía nes últimes hores un comunicáu nel que denuncia “un nuevu casu de represión llingüística”, que pa los carlistes asturianos produzse “pola falta d’un marcu xurídicu que realmente protexa la llingua asturiana”. El casu en cuestión, comenten los responsables de la formación “consistió en qu’al partíu políticu más antiguu d’Asturies nun-y permitan presentase a les próximes elecciones col so nome n’asturianu, Partíu Carlista d’Asturies”.

El Partíu Carlista recuerda “que d’alcuerdu colos Estatutos vixentes del “Partido Carlista”, dende la so llegalización como formación política en 1977, les agrupaciones territoriales del “Partido Carlista” tienen el deber y el derechu d’utilizar na so denominación la llingua vernácula del so correspondiente asina como a facer referencia al ámbitu territorial sobre’l qu’actúen na so denominación. Polo que la demonación de los carlistes d’Asturies ye Partíu Carlista d’Asturies.

Por embargu, y según afirmen dende la organización, el día 31 del pasáu mes de xineru, al representante electoral del Partíu Carlista énte la Xunta Electoral Provincial d’Asturies, “negóse-y la posibilidá de que les candidatures del PC n’Asturies pa les próximes elecciones xenerales llevaren la denominación “Partíu Carlista d’Asturies”, o hasta la de “Partido Carlista-Partíu Carlista”.

Énte esti problema, el PC d’Asturies “desplicó-y al funcionariu de la Xunta Electoral Provincial qu’en Cataluña’l PC, nuna situación llegal asemeyada, presentárase a les mesmes elecciones ensin dengún problema como “Partit Carlí de Catalunya”, la rempuesta del funcionariu, siguen nel comunicáu, “foi que’equí nun hai cooficialidá”.

La rempuesta del funcionariu da a entender al Partíu Carlista “qu’esti nuevu casu de negación de los derechos llingüísticos que nos correspuenden a los Asturianos d’alcuerdu colos principios democráticos más fundamentales vien a amosar otra vuelta que l’únicu marcu xurídicu-políticu nel que la Llingua Asturiana va poder ser utilizada ensin dengún tipu de torgues llegales por quien lo quiera ye la oficialidá”.

El Partíu Carlista d’Asturies presentáse n’Asturies al Congresu y al Senáu y recuerda que “demientres nun llogremos que l’asturianu seya una llingua oficial, el so futuru como llingua d’usu asina como los nuesos derechos llingüísticos como pueblu van tar na más absoluta precariedá”.

Páxina del Partíu Carlista d’Asturies