El Partíu Asturianista ve un llaváu d’imaxe del Ayuntamientu na gala “Xixón fala n’asturianu”

L’Agrupación del Partíu Asturianista de Xixón critica nun comunicáu la gala “Xixón fala n’asturianu”, celebrada va cerca d’un mes nel Teatru Xovellanos, yá que ve nesta actividá “daqué colo que l’Ayuntamientu xustifica la so política llingüística faciendo un llaváu d’imaxe”.

Pal PAS, la realidá del usu del asturianu en Xixón pue vese claramente na revista “Gaceta de Xixón”, onde, comenten dende’l PAS, nel segundu númberu del añu nun hai nin una sola páxina n’asturianu, de les 22. Un fechu que’l PAS considera “demuestra la importancia que da al asturianu esta alministración”.

Los asturianistes piden al gobiernu municipal d’IX y PSOE “una mayor presencia del asturianu na Gaceta, yá qu’hai que recordar que la pagamos ente toos, tanto falantes d’asturianu como de castellán”.

Pal PAS “les nueves ordenances tendríen de recoyer una mayor implicación del Ayuntamientu n’estos temes y tratar que la llingua asturiana s’integre na vida cotidiana y na actividá diaria de los ciudadanos de Xixón”, lo que pal PAS consigue “con un bon Plan de Normalización” y non con “unes ordenances que son un nuevu llaváu d’imaxe, papel moyao”.