El Muséu Nicanor Piñole de Xixón ofrez dende’l pasáu 6 de mayu l’amuesa titulada “La fotografía como arte” y na que se presenta parte de la obra desenvuelta pol fotógrafu xixonés Arturo Truan dende la primera década del sieglu XX hasta mediaos los años trenta. Semeyes coloreaes, retratos, paisaxes y bodegones fotografiaos col oxetivu de la cámara del artista, igüen esta amuesa na que s’esponen tamién dellos de los sos trabayos comerciales en formatu de tarxeta postal.
Arturo Truan, nacíu en Xixón nel añu 1868 y muertu en Santander en 1937, cultivó diverses disciplines artístiques a lo llargo de la so vida, sobremanera la pintura y la fotografía. Nesta amuesa de la so obra gráfica ufiértase la ocasión de comprebar los personales esperimentos de combinar entrambes disciplines con resultaos estéticos qu’averen la obra de Truan a les vanguardies. Contemporáneu de pintores del rexonalismu asturianu como Nicanor Piñole y Evaristo Valle, les sos fotografíes paecen beber nes mesmes fontes de la realidá novedosa de la naturaleza y el paisaxe: estampes de playa, retratos de la vida cotidiana o del entornu rural, cásique toos procedentes del conceyu de Xixón, imáxenes que ronden el tópicu desbordándolu con un sorprendente
xuegu de lluces, sombres y esperimentación col color. Mesmo se puede ver esti afán d’aventura esperimental nes obres destinaes a fines comerciales como tarxetes postales, delles abondo populares nel so tiempu.
Les composiciones de bien de los trabayos recoyíos nesta amuesa recuerden a les de la pintura, con un procuru pola recreación de la figura, l’amestáu de formes y volúmenes, too fecho al través de técniques emparentaes col pictoralismu. Na evolución de la so obra aprécisase un procuru del artista por buscar nuevos llinguaxes arreyaos a l’abstración y a una nueva oxetividá de lo retratao. Adelantráu al so tiempu, Arturo Truan desenvolvió una obra que lu allega a les vanguardies fotográfiques europees y americanes, especialmente al movimientu constructivista. El Piñole de Xixón dexa agora la oportunidá de conocer un rellumu provechosu d’esa obra a mediu camín ente lo local y lo cosmopolita, ente’l realismu figurativu y el desenfoque modernu de la realidá.