El titular d’Educación, Íñigo Méndez de Vigo, manifestó la semana pasada qu’hai “demasiaos universitarios y pocos alumnos de Formación Profesional” n’España.
El ministru fixo estes declaraciones nun foru hispanu-alemán en Berlín, onde cavilgó sobre los cambeos educativos que’l país tien qu’aplicar pa que la economía nacional caltengase na sienda de la crecedera sostenible.
“Va demasiada xente a la universidá. Tenemos que permediar”, sorrayó’l ministru na capital alemana. La Conferencia de Rectores de les Universidaes Españoles, la CRUE, refugó les sos declaraciones: “Les cifres nun indiquen que sobren universitarios”. Y el so propiu partíu, el Partíu Popular, tuvo que matizar les sos palabres dende Madrid.
“Lo que de xuru el ministru quixo dicir y dixo y nun puede recoyese nuna sola frase ye que la Universidá y la Formación Profesional nun son enemigos; al aviesu, son complementaries que constrúin país”, defendió’l vicesecretariu xeneral de Sectorial del PP, Javier Maroto.
Los rectores y Javier Maroto taben axuntaos na CRUE cuando conocieron les palabres del ministru. La conferencia de rectores empezó esti miércoles col PP una ronda de xuntes colos partíos políticos previes de les elecciones del 20 d’avientu. Tanto’l representante del PP como’l de el rectores fueron preguntaos por esti asuntu a la salida del alcuentru.
“Si comparen los datos d’España cola OCDE nun ye esactamente ciertu”, retrucó’l vocal del Comité Permanente de la CRUE y rector de la Universidá Ramon Llull, Josep Garrell.
Un informe del Ministeriu d’Educación (Panorama de la Educación. Indicadores de la OCDE 2014) ufre datos que nun se correspuenden coles palabres del ministru. España, con cerca d’un millón y mediu d’universitarios, tien un 52% de tases d’accesu a la universidá (porcentaxe envaloráu d’una cohorte d’edá que se preve apuerte a la universidá a lo llargo de la so vida), un porcentaxe que lu asitia per debaxo de la media frente a un 56% de la unión Europea y un 58% de la Organización pa la Cooperación y Desenvolvimientu Económicos (OCDE)