El Ministeriu de Vivienda estudia integrase nel Patronatu de la Fundación Óscar Niemeyer d’Avilés

El Conseyeru d’Infraestructures, Política Territorial y Vivienda, Francisco González Buendía, alcontróse esta mañana cola Ministra de Vivienda, Beatriz Corredor, que manifestó la so intención d’integrar el Ministeriu de Vivienda nel Patronatu de la Fundación Óscar Niemeyer.

Al actu, que se celebró na sede del Ministeriu de Vivienda en Madrid, asistió tamién el Director Xeneral de Vivienda, Enrique Álvarez González.

Nel alcuentru, Beatriz Corredor comunicó a Buendía que la tramitación pa que’l Centru Cultural Internacional Óscar Niemeyer seya sede permanente de los fondos documentales de la Bienal Iberoamericana d’Arquitectura y Urbanismu (BIAU) sigue la so marcha correctamente.

La Bienal Iberoamericana d’Arquitectura y Urbanismu surdió en 1998 por iniciativa del Ministeriu de Vivienda, cola intención de crear un espaciu d’alcuentru ente los arquitectos de la Península y los del otru llau del Atlánticu. El mes d’abril pasáu, el Conseyu Rector de la BIAU adoptó por unanimidá la decisión d’emprimar los trámites pa la robla d’un alcuerdu de collaboración pa que’l Centru Cultural Internacional Óscar Niemeyer se convierta en sede permanente de la Bienal, contando nun principiu nes sos instalaciones colos fondos documentales de la Bienal.

Asina mesmo, alcordóse que’l mes de xunetu próximu’l Conseyu de la BIAU s’aconceye n’Avilés onde celebra una sesión ordinaria y va aprovechar pa conocer de primer mano toles actividaes que se desendolquen en tornu al futuru Centru Niemeyer.

Per otra banda, los responsables en materia de vivienda del Gobiernu central y autonómicu fixeron un repasu de la execución del Plan de Vivienda 2005-2007. A 28 de febreru de 2008 el grau de cumplimientu algamáu n’Asturies ye del 142% (el pieslle definitivu del exerciciu de 2007 ellabórase con datos a 31 de mayu de 2008).

Respecto a la Renta Básica d’Emancipación pa xóvenes, el Conseyeru d’Infraestructures, Política Territorial y Vivienda afirmó que “Asturies ye una de les comunidaes autónomes más avanzaes na so xestión”. El númberu de solicitúes concedíes dende la so puesta en marcha ye de 2.600.

Finalmente, la Ministra de Vivienda manifestó la so intención de visitar Asturies a finales del presente mes de xunu o principios de xunetu, onde posiblemente, según señaló Buendía, se formalice la incorporación del Ministeriu que dirixe al Patronatu Fundación Óscar Niemeyer.

Francisco González Buendía valoró de “mui positivu” l’alcuentru calteníu cola máxima responsable en materia de vivienda del Gobiernu central, que continúa cola so ronda de contactos con responsables autonómicos.