Candás va acoyer la última selmana d’agostu el II Taller d’Iniciación al Monologuismu Cómicu Asturianu, un cursu impartíu pol humorista y actor Carlos Alba “Cellero”. Los oxetivos del taller son la formación de futuros ínterpretes de monólogos y la preparación pa l’adaptación escénica de la tradición humorística oral. La metodoloxía del cursu ye fundamentalmente práctica y preténdese que los futuros monologuistes deprendan a cuntar hestories dende’l primer día de clase.
Cellero ye un de los cómicos asturianos más célebres nel xeneru del monólogu tradicional y tien incorporao a la puesta n’escena propia de los cuntadores d’hestories humorístiques del país les técniques interpretatives del teatru universal. Llicenciáu en Ciencies de la Información pola Universidá Complutense de Madrid, actor y cuentacuentos, Carlos Alba, xunta otros cómicos actuales remaneció’l xéneru del monologuismu asturianu llevándolu a nuevos públicos, especialmente a la xente mozo. Como monologuista tien tres espectáculos individuales: “Por falar vencí la güestia”, basáu en cantares y versos de finales del XIX y principios del XX; “Del chigre”, monólogos propios sobre asuntos d’anguañu, dende’l galipote del Prestige a les carreres de Fernando Alonso; y “Cellero, el monologuista”, una amestanza de testos d’autores como Delestal, García Oliveros o Rubén Sánchez Vicente.
El taller d’iniciación al monólogu que va impartir Carlos Alba “Cellero” tien un programa nel que s’escomienza analizando los testos de los monólogos y desaminando’l material narrativu col que construi un cómicu les sos hestories. La espresión corporal, la modulación ya impostación de la voz a la manera tradicional o la improvisación son otres de les materies que se van desenvolver nel taller. L’atención a grabaciones de monologuistes tradicionales y la recoyida de materiales de la tradición oral, formen parte tamién del conteníu del cursu.
El númberu d’alumnos pal que ta pensáu esti taller d’iniciación al monologuismu cómicu asturianu ye d’ente 10 y 15, y la formación va tar dividida nun total de cinco clases, en total 15 hores lectives. Unos díes enantes del empiezu del cursu, el profesor va repartir ente los sos alumnos una serie de testos pa que los vayan preparando enantes d’entamar y tamién va trabayase sobre les hestories qu’ellos recueyan nel so entornu.
El cursu va impartise ente los díes 22 y 26 d’agostu, entrambos incluíos, n’horariu de 18.00 a 21.00 hores y el preciu de la matrícula ye de 24 euros, qu’amás del cursu inclúi dos entraes pa espectáculos del Salón de Teatru Costumista. El teléfonu de contactu pa inscribise o solicitar más información ye’l del Teatru Prendes de Candás:: 985 871 021.