El Llar La Llegra d’Uviéu entama una folixa esti vienres 3 pa recompensar el crowdfunding “Abriendo espaciu”

El Llar La Llegra d’Uviéu entama una folixa esti vienres 3 d’abril pa entregar les recompenses a la xente que colaborara nel crowdfunding “Abriendo espaciu”. Una espicha, xuegos tradicionales y conciertos van formar el programa del actu pa cellebrar l’éxitu de la campaña de financiación colectiva per Internet que facilitara l’apertura del dinámicu llar n’Uviéu.

Necesitábense 3000 euros pa costear les obres del llocal. A la fin algamáronse en 40 díes 4215 euros col sofitu de 138 persones de dientro y fuera d’Asturies. La campaña de crowdfunding “Abriendo Espaciu” cola que’l Llar La Llegra buscó financiación per Internet pa poder abrir les sos puertes foi un éxitu. Por eso, esti vienres 3 d’abril el nuevu espaciu autoxestionáu de la izquierda soberanista asturiana va cellebralo y dar les recompenses del crowdfunding.

A les 13.30 va arrancar la folixa con una actuación n’acústicu de Filanda a la que va siguir una espicha abierta –na que, quien quiera, pue collaborar llevando xinta de casa-. Dempués, a les 16.00, va ser el turnu de los xuegos tradicionales nel prau de llau de La Llegra hasta les 18.00, hora na que va haber una nueva actuación musical. El final del actu va ser dende les 19.30 hasta les 22.30 –hora de pieslle del llocal-, momentu nel que va proyectase’l videu “Abriendo Espaciu”, inaugurase’l mural coles pallabres que la xente escoyó nel crowdfunding y entregar les recompenses a tola xente que collaboró económicamente cola financiación colectiva al traviés de la plataforma Verkami. La folixa ye abierta a tol mundu y, quien nun puea dir esti vienres 3 a pola recompensa, pue pasar otru día por ella a esti llar asitiáu na cai 40 de la cai El Postigu Baxu.