La XXXVIII edición del Gran Desfile d’Antroxos, Moxigangues y Carroces foi la protagonista d’esti Martes de Antroxu n’Avilés. Tratose d’una de les cites de mayor pesu nel programa antroxeru, y tamién de les más participatives, que cuntó col televisivu Alberto Rodríguez, popularmente conocíu como “El Folixeru”, como maestru de ceremonies.
El desfile entamó a les 18,30 hores dende la cai de José Cueto, siguiendo pola plaza de La Mercé, la cai y plaza de Pedro Menéndez, les cais de La Muralla y La Cámara, pa rematar na plaza d’España.
Una vegada ellí diose llectura al veredictu del xuráu, que determinó los ganadores de los premios a los trés meyores amarutes en caúna de les categoríes del concursu: Grupos, Pareyes ya Individuales, dotaes con distintes cantidaes económiques. qu’aportaben a un total de 2.960 euros.El xuráu va valorar aspeutos como la calidá, la orixinalidá o l’esfuerzu na realización del disfraz.
Per otru llau, mientres tola xornada hebo animación de cai por tola ciudá coles fanfarries Menudos Notes, El Felechu, Pepe El Chelo, Picante, El Ventolín y L’Estrueldu.