El Garrapiellu y el Foru Arte Ciudá critiquen la destitución de Pepe’l Ferreiro

La Tertulia Cultural “El Garrapiellu”, presidida por Tino Lozano, y el Foru Arte Ciudá, que coordina Ánxel Nava, amosaron en dellos comunicaos la so protesta pola destitución de Pepe el Ferreiro de la dirección del Muséu Etnográficu de Grandas de Salime. Pa El Garrapiellu “Ye una ruindá atacar a la persona que fundó esti muséu, dotólu de material y trabayó tantos años hasta algamar l’ésitu de visitantes qu’agora tien”. Les dos organizaciones piden “la so restitución nel cargu” y denuncien “la falta de tresparencia al nomar a deu un sustitutu pa una plaza que nun sal a concursu públicu”, lo que ye pal FAC “un bon exemplu del camín antidemocráticu que siguen los responsables culturales de la nuestra autonomía, que desprecien el conxuntu de les artes y la cultura d’Asturies”.

El Garrapiellu camienta que con esta decisión “non sólo nun se reconoz el llabor de la xente que s’ocupa de caltener la cultura tradicional, talamente paez que se quier acabar cola cultura etnográfica, patrimonial o ambiental d’Asturies”, y albidra que namás se premia nesti pais “la burocracia y l’actitú servil”. El Garrapiellu sofita esta causa, pide respetu al so llabor, desixe la restitución nel cargu de Pepe el Ferreiro y la dimisión de los responsables de lo que consideren “esti ataque a la cultura asturiana”.

Amás, Izquierda Xunida va facer güei delles entrugues parllamentaries a la Conseyería de Cultura sobre esta cuestión: “¿Cuáles fueron les razones poles que dellos representantes del Principáu nel Consorciu del Muséu Etnográficu de Grandas de Salime votaron a favor de dichu cese?, ¿Qué méritos axunta’l recién nomáu Director del Muséu? Y ¿Cuálos yeren les condiciones del contratu del Sr. Naveiras Escanlar y cuálos son les condiciones del contratu del nuevu Director?”.