El Garrapiellu felicítase pola so presencia en Mercaplana

Un añu más la Tertulia Cultural “El Garrapiellu” tuvo presente nel Salón de la Infancia y la Xuventú de Mercaplana, cita perimportante pa los más pequeños d’Asturies na ciudá de Xixón. Mercaplana ye un llugar d’alcuentru ente los neños y neñes y los sos mayores.

Siguiendo una llinia lludico-educativa-deportiva común, nesti salón pue atopase de too: alfareria, reciclaxe, animales, bebeteca, planetariu, deportes, etc… Esti añu el requexu dedicáu a la cultura asturiana, representada nesta ocasión pol Garrapiellu y la Oficina Municipal de la Llingua del Ayuntamientu de Xixón, medró guapamente, col enfotu de caltener l’esitu d’otres ediciones. Xuntes estes dos entidaes, ficieron un llabor d’espardimientu de la nuesa cultura: deportes, xuegos y talleres, engabitaron a los monitores a sacar p’alantre esta actividá.

Hai que decir que la organización de Mercaplana pon bien d’enfotu en facer qu’El Garrapiellu trabaye a gusto y nel mesmu sen que trabaya demientres l’añu. A la Tertulia Cultural El Garrapiellu prestaría-y tar presente nes ediciones vinientes de Mercaplana, esperando qu’esti eventu se caltenga coles mesmes directrices de anguaño, pa nun dexar de ser una cita obligada pa bien d’ellos de rapazos y rapaces de toa Asturies.