El futuru del asturianu centra un alderique na Universidá d’Uviéu

Na tarde d’esti llunes, 14 de mayu, a les seis y na Facultá de Formación del Profesoráu y Educación de la Universidá d’Uviéu, el Conseyu d’Estudiantes de la Universidá d’Uviéu axunta nuna mesa redonda titulada “Llingua asturiana na Universidá d’Uviéu: ¿Y agora, qué?”, a dellos de los principales sectores universitarios y sociales que trabayen pola normalización de la llingua asturiana na Universidá, col envís de reflexonar sobre la situación presente del idioma na nuestra institución académica -tanto del puntu de vista del so usu como del so estudiu-, arriendes de les posibilidaes y estraxes futures nel camín pa la so normalización.

Na mesa redonda van participar, Xosé Antón González Riaño, miembru de l’Academia de la Llingua Asturiana y direutor de la Universidá Asturiana de Branu, amás de Profesor Titular de la Universidá d’Uviéu; Xulio Viejo, miembru del Seminariu de Filoloxía Asturiana y Profesor Titular de la Universidá d’Uviéu; Llucía Menéndez Suárez, de Xunta Moza; ya Inaciu Galán, presidente d’Iniciativa pol Asturianu y miembru del Conceyu Universitariu pol Asturianu.

En definitiva, y según la organización “ponentes de primer orde que faen d’esta mesa redonda una oportunidá perbona p’axuntar reflexón y aición al rodiu del asturianu nel nuestru ámbitu universitariu y social, nuna cita a la que tán convidaos tolos miembros de la comunidá universitaria y toa persona esmolecía pol futuru de la llingua asturiana”.