El diputáu del Bloque fai entrugues na Xunta a la Conseyera de Cultura, alrodiu de la Rede de Normalización

El diputáu del Bloque por Asturies y Portavoz del Grupu Parllamentariu Mestu, Roberto Colunga Fernández, presentó nel día de güei deles siguientes preguntes a la Conseyera de Cultura y Turismu, Mercedes Álvarez, na que pon el déu na mancadura que vien amuesando’l Gobiernu asturianu con un discursu favoratible al cumplimientu de la llei d’usu, pero dafechamente separtáu d’ella na realidá.

Les entrugues que tiene de contestar per escritu la Conseyera de Cultura en relación a la llingua asturiana son les que vienen darréu:

¿Por qué la Conseyería da la mesma subvención a Conceyos que tienen abiertu un Serviciu de Nornalización Llingüística (SNL) durante tol añu qu’a otros que lu piesllen tolos años, cuando un SNL necesita continuidá y, amás, en munchos casos coincide cola solicitú y xustificación de subvenciones?

¿Qué se fai pa evitar l’agraviu comparativu d’un Conceyu como Mieres que tolos años pieslla’l SNL durante meses?

¿Por qué se da una subvención nominativa pa funcionamientu de los SNL y non un conveniu ente’l Principáu y los Conceyos, figura que permitiría esixir el cumplimientu d’unos mínimos en cuantes a normalización llingüística?

¿Por qué s’aparó l’aprobación d’un modelu de conveniu ente’l Principáu y los Conceyos pa regular los SNL y que yá taba redactáu y a la espera de la so tramitación nel últimu Conseyu de Gobiernu nel 2007 y que diba ser una manera eficiente pa evitar que dellos SNL piesllen varios meses cada añu a la espera de que s’aprueben les subvenciones?

¿Cuántes reuniones de coordinación hebo nesta llexislatura ente los SNL de los Conceyos, la Dirección Xeneral de Política Llingüística o la Oficina de Política Llingüística, cola directora xeneral o cola xefa de la oficina?

¿Por qué la Rede de Normalización Llingüística nos Conceyos, creada pola Conseyería de Cultura nel 2004, nun tien entidá xurídica y namás esiste d’ella un logotipu? ¿Por qué nun s’usa esa ferramienta que diba afitar los SNL, dar más continuidá a la normalización, más puxu a les campañes, una imaxe común, más implicación de responsables políticos, etc.?

¿Por qué nun hai redactáu un Plan de Normalización Llingüística na presente llexislatura?

¿Por qué, nun siendo la de les rebaxes, nun se xeneralizaron a otros conceyos d’Asturies campañes desarrollaes con ésitu en conceyos con SNL y que se consideraron d’interés yá que la Conseyería les subvencionó?

¿Qué exemplos d’usu tresversal de la llingua asturiana nes distintes conseyeríes del Principáu pue poner nesta llexislatura? ¿Hai alcuerdos y compromisos firmaos qu’especifiquen qué usu se-y va dar al asturianu nes distintes conseyeríes?

¿Por qué la directora xeneral de Política Llingüística fala en castellán n’actos públicos n’Asturies ente público asturiano?

¿Por qué nun s’esixe compromisu con una verdadera normalización llingüística a los medios de comunicación que reciben pa ello subvenciones suculentes?