El CUPA denuncia qu’usar l’asturianu na universidá ye más fácil fuera d’Asturies

El Conceyu Universitariu pol Asturianu (CUPA) tuvo anuncia de que la Universitat Oberta de Catalunya (UOC) permitió la realización d’un Trabayu Fin de Máster n’asturianu. “Un fechu que nun llamaría l’atención si nun fuera porque na propia universidá asturiana surden torgues de tou tipu cuando se quier presentar cualesquier tipu de trabayu nesta llingua”, espliquende dende’l CUPA. Y ye que según denuncien, “l’asturianu recibe en munchos casos mayor reconocencia fuera que dientro d’Asturies”.

El CUPA felicita a la UOC polo que talanten ye “un comportamientu respetuosu col alumnu asturianu del máster que pidió facer el trabayu nel so idioma, pol exemplu que supón pa la Universidá d’Uviéu”. Recuerden qu’hasta va poco, y namás dempués de les protestes del CUPA y otros colectivos y persones afectaes, la Universidá d’Uviéu “nun dexaba presentar tesis n’asturianu con normalidá, xenerando munchos perxuicios a quien quería facelo nesta llingua”.

El fechu demuestra pal CUPA “que la llingua asturiana precisa d’un meyor tratamientu na Universidá d’Uviéu”, pues camienten que “nun ye normal que l’asturianu pueda usase con más facilidá fuera que dientro de los territorios onde ye llingua propia y amás, protexida polos Estatutos de la Universidá”.