La CXXXIV edición del Certame de Ganáu de San Agustín, que se celebra ente’l 25 y el 28 d’agostu nel Pabellón d’Esposiciones de la Madalena n’horariu de 10 a 22 hores, va cuntar cola participación de 580 exemplares de 108 ganaderíes provenientes de 63 localidaes asturianeses.
Nesta edición del Certame de Ganáu de San Agustín van participar 42 asturcones y 538 vaques de distintes races: 125 d’Asturiana del Monte; 165 d’Asturiana de los Valles (tipu normal); 196 Asturiana de los Valles (doble grupa) y 52 exemplares de Parda Alpina.
Pa completar la programación, mientres los díes de Concursu va instalase una granxa con animales domésticos y tamién podrá contemplase la esposición gráfica: “Les Races Autóctones Asturianes, 40 años pa la so recuperación”. Va Tar compuesta por fotografíes y paneles esplicativos coles característiques de cada tipu d’animal. L’amuesa pretende afondar na divulgación de les races autóctones asturianes: l’Asturcón, la vaca Casina o Asturiana del Monte, la vaca Carreñana o Asturiana de los Valles, la oveya Xalda, la cabra Bermeya, el gochu Asturcelta y la pita Pinta, toes elles especies protexíes. Pretende tamién amosar el procesu qu’arrincó nos años 70 cola so aceptación científica, la creación d’asociaciones de criadores pa la so protección y finalmente l’asunción de la defensa d’estes races per parte de los organismos públicos.