El conceyal de Turismu, Alfredo García Quintana presentó esta selmana pasada, nel salón de plenos, la nueva web de Turismu que punxo en marcha’l Conceyu d’Uviéu: visitoviedo.info. Acompañó al edil, el responsable de Asac Comunicaciones, Marco Prieto, empresa encargada de desenvolver esti nuevu portal.
El conceyal de Turismu empezó resumiendo les característiques qu’hai de tener una web de turismu: “Ha ser capaz de convencer al turista con un diseñu curiosu, senciellu y eficaz, con una información costantemente actualizada y un llinguaxe qu’espierte l’interés del turista, en dellos idiomes. Asina, so esta premisa naz visitoviedo.info, puesta en marcha güei mesmu”. A xuiciu del responsable municipal de Turismu y Hostelería “na nuesa nueva web creo que cumplimos tolo espuesto enantes. El dominiu ye visitoviedo.info, una fórmula que yá ta estandarizada y almitida por tolos destinos que quieren representar daqué nel mercáu turísticu. Traducida al inglés, francés, alemán, incorpora un motor de reserves n’establecimientos hoteleros, contien un área privada onde vamos colgar informes realizaos pol Observatoriu Turísticu ya información sobro recursos y curiosos ya información útil como planos, agospiamientos hoteleros, hosteleros… con especial relevancia d’Uviéu, como Orixe del Camín de Santiago o’l certame Uviéu World Cheese Awards”.
Prieto tamién desglosó dalgunos de los conteníos de visitoviedo.info. Y esclarió que “el mesmu sistema respuende en función del dispositivu nel que los consultemos, cumple los máximos estándares en materia d’accesibilidá”. Y en cuanto al conteníu “con un diseñu llimpiu y saléu en vertical”, destacó que “tán cargaes 120 páxines y más de 700 recursos turísticos magar se va actualizar permanentemente, previa solicitú al Conceyu. Los profesionales del sector tienen una zona privada con información d’interés pa los sos negocios ya informes del Observatoriu de Turismu”, sorrayó Prieto.