Dende’l pasáu 8 de marzu y hasta el 15 de mayu de 2018 ábrese’l plazu de presentación d’orixinales a concursu nuna nueva edición del Premio Café Xixón.
Un añu más, el Conceyu de Xixón entama una nueva convocatoria d’esti prestixosu ya históricu premiu lliterariu con una vinculación emocional cola Villa de Xovellanos que nun paró de xorrecer dende l’añu 1989.
Los y les autores van poder unviar les sos noveles en papel o en formatu dixital al traviés de la Oficina virtual, adecuandose a les siguientes Bases del Premiu 2018.
A la convocatoria del Premiu de Novela Café Xixón 2017 presentáronse un total de 941 noveles. El Premiu de Novela Café Xixón ye un premiu que se propón fomentar la creación lliteraria, con independencia absoluta d’intereses comerciales, independencia garantizada por un xuráu de prestixoses personalidaes lliteraries, ensin llimitación territorial y centrada namá nel valor artísticu de les obres presentaes a concursu. Esti premiu ta dotáu con 20.000 €, apurríos pol Conceyu de Xixón y la publicación de la novela per parte de la Editorial Siruela. El Premiu de Novela Café Xixón 2017 foi a parar a Pedro González Moreno pola so obra “La mujer de la escalera”.
El Conceyu de Xixón vien apostando dende 1989 por un premiu que venceya’l nome de la nuesa ciudá a una iniciativa artística del máximu prestíu, con una llarga hestoria cultural a los sos llombos. El Premiu Café Xixón pa noveles curties foi creáu en 1949 pol actor Fernando Fernán-Gómez y dellos amigos colos que compartía conxusta nel célebre café del Paséu de Recoletos (Camilo José Cela, José García Nieto, Manuel Aleixandre, Eduardo Haro Tecglen, Regino Sáinz de la Maza, Manuel Pilastres…)