El Coleutivu “Pola Xuntanza” valora los esfuercios por facer un actu unitariu l’8-S

El Coleutivu “Pola Xuntanza” valoró al traviés d’un comunicáu los actos unitarios desendolcaos polos partíos nacionalistes l’8 de setiembre. Pal coleutivu ciudadanu, que valora positivamente los esfuercios fechos, “la so propuesta pasa por facer un solu actu unitariu en futures convocatories que cristalice nuna plataforma amplia de tol asturianismu y/o nacionalismu políticu nes vinientes eleiciones nacionales y de conceyos nel 2011”.

Pa “Pola Xuntanza”, esti nuevu escenariu posibilita alcuerdos ente los partíos asturianistes “que fai un añu yeren improbables, colo que supón un avance na idea de facer una sola candidatura nacionalista nel 2011”.

La voluntá de los diferentes partíos nacionalistes de querer facer actos unitarios ye valorada de forma positiva pol Coleutivu “Pola Xuntanza”, poro consideren que “s’abre un nuevu ciclu políticu onde l’asturianismu políticu tien d’entendese col algame de puxar por un frente común nacionalista onde deben tar tolos partíos y sectores políticos que nagüen pola xuntanza del nacionalismu asturianu”.