El Centru de Servicios Universitarios (CSU) acueye dende’l viernes y hasta’l 29 d’avientu la esposición fotográfica “A grande faina. La campaña del Argus” na que se cunta en semeyes del aventureru, marín y fotógrafu australianu Alan Villiers (1903-1982) la fase final de la gran aventura de los portugueses a la busca del bacaláu nos mares australes.
L’actu d’apertura, que por cuenta de les condiciones sanitaries foi semipresencial, tuvo llugar cola presencia de l’alcaldesa d’Avilés, Mariví Monteserín, y el rector de la Universidá d’Uviéu, Santiago García Granda, xuntu al primer secretariu de la Embaxada de Portugal n’España, Pedro Marcelo Curto. Virtualmente al traviés de proyección de videos de saludu participaron el presidente de la Cámara Municipal de lÍhavo, Fernando Caçoilo; los directores de les escueles navales de Lisboa y Marín, el contra almirante Mario José Simoes y el capitán de navío, Ignacio Cuartero, respectivamente, toos socios de la UIM, cola que so cooperación permite otres actividaes conxuntes como esta amuesa mientres la campaña 2021 con ocasión del V centenariu de la primer circunnavegación.
L’amuesa foi vencida pol Muséu Marítimu de Ílhavo, de Portugal, y refier en semeyes orixinales ya inédites tomaes por Alan Villiers pa National Geographic Magacín cuando embarcó nel Argus en 1950 pa faer la crónica de la campaña de pesca. Nel CSU podrá visitase de llunes a vienres de 9 a 21 hores, y l’esposición va ampliar con nueves obres que se van esponer del 20 de payares al 10 d’avientu nel Palaciu de Valdecarzana.
La campaña del Argus de Alan Villiers ye’l principal documental sobro la pesca del bacaláu polos portugueses a mediaos del sieglu XX. Por invitación de Pedro Teotónio Pereira, embaxador portugués en Washington, na primavera de 1950 Villiers embarcó a bordu del Argus, unu de los veleros más pimpanos de la mítica Flota Blanca dedicada a la pesca del bacaláu con dorys, en llargues campañes de viaxes tresoceánicos a Terra Nova y al estrechu de Davis. Villiers compunxo un trípticu que percorrió’l mundu: un llibru, xuna película y un magníficu álbum de semeyes, qu’equí s’espón, que nos dexen entender los múltiples significaos d’esti patrimoniu únicu y desentrañar la relación del Portugal del réxime dictatorial salazarista (el llamáu Estáu Novo) col drama épicu de la pesca del bacaláu.
Con esti doble oxetivu de remembrar y eponderar la guapura de les imaxes de la obra de Alan Villiers, el Muséu Marítimu de Ílhavo asumió’l proyectu de recuperar y presentar, íntegra y per primer vegada, esta colección de magnífiques fotografíes, amás de la película The Bankers – The Voyage of the Schooner Argus. Años más tarde xunióse la producida por National Geographic , The Lonely Dorymen y la reedición del llibru, traducíu a más d’una docena d’idiomes y n’español publicáu por Trea Ediciones. La Universidá d’Uviéu acordies con los sos socios na plataforma UIM (la Escuela Naval de Lisboa, la Escuela Naval Militar de Marín, Fórum Oceano) y cola collaboración de la Cámara Municipal de Ílhavo y el Conceyu d’Avilés, abre con esta esposición la so contribución a conmemorar el V centenariu de la primer circunnavegación, como alcordanza y homenaxe a los navegantes peninsulares artífices del mundu modernu, que cinco sieglos dempués siguíen cruciando l’océanu embarcaos en veleros de pesca como’l Argus, Creoula, Santa María Manuela, Novos Mares …y tantos otros, nos que tamién saleaben dellos españoles.