Redacción.
El Centru d’Arte de La Llaboral tien abierta la esposición ‘It’s simply beautiful’, una amuesa onde cinco artistes reflexonen sobre’l conceptu de la guapura nel mundiu actual, un llugar marcáu pola globalización y la tresculturidá. Según los organizadores, “esta esposición da continuidá a les yá clausuraes, tres de les cuatro primeres esposiciones, ‘Feedback’, ‘LLABciberespacios’ y ‘Estensiones-Anclaxes Fase I’.
Los cinco artistes que participen na esposición fueron seleccionaos polos comisarios Peter Doroshenko y Jerome Sans y son l’asturianu Carlos Coronas, l’estaoxunidense Dzine, el tailandes Surasi Kusolwong, el británicu Mark Titchner y el frances Fabien Verschaere.
Los trabayos van mostrase hasta’l 15 d’ochobre nes sales destinaes a les artes visuales de LLABoral, sales 1A y 1B, el vestíbulu del Centru y les sales plataforma. Cola amuesa, los organizadores “quieren dar una visión compartida de los nuevos roles activos dientro de la sociedá y el papel que xueguen les obres d’arte nel estáu d’ánimu del espectador’.