L’actu d’entrega de premios del Concursu de Fotografía Xixón Lleendo va tener llugar esti llunes 21 de xineru a les 19:00 hores nel Salón d’Actos del Centru de Cultura Antiguu Instituto Xovellanos, momentu nel que van conocese los ganadores.
Mientres la ceremonia conoceranse los nomes de los ganadores del concursu en dambes categoríes (de 12 a 17 años y de 18 a 29 años), quien van recoyer los sos diplomes acreditativos y los premios correspondientes: mini iPad más llote de llibros para los primeros premios y llector de llibros electrónicos más el llote de llibros para los segundos.
Amás de les obres premiaes, el xuráu formáu por D. Luis Sevilla, fotógrafu d’El Comerciu, D. Pedro Gutiérrez Hernández, presidente de l’Asociación Zona 5-Grupu fotográficu y Dña. María Fernández Parráu, Técnica de Programes del Departamentu de Museos de la Fundación Municipal de Cultura, Educación y Universidá Popular, escoyó otres 12 obres presentaes al concursu que xunto coles 4 ganadores, van formar parte d’una esposición itinerante que se va inaugurar esti mesmu día na Biblioteca Municipal d’El Llanu y que va poder visitase hasta’l 28 de febreru n’horariu de 9 a 20 hores.
Darréu, la esposición va percorrer delles biblioteques de la Rede Municipal de Biblioteques de Xixón y dellos centros educativos de la ciudá según el calendariu previstu.