Dende’l so llanzamientu’l pasáu 9 de xineru en YouTube, “El Cantar del Vasu” vien algamando una importante repercusión nesta rede social, superando nesti tiempu ampliamente les 15.000 visites y encaminándose ya a les 17.000. La iniciativa, asemeyada a la desendolcada n’Irlanda cola “Cup Song”, quier afitar la importancia de la tresmisión de la llingua asturiana a les nueves xeneraciones y ye la primer iniciativa del proyeutu Xuncir, entamáu por Pablo A. Quiroga Prendes, Policarpo Mencía Álvarez ya Iván Huerga Antuña.
Nesta iniciativa collaboren instituciones como’l Real Sporting de Xixón, el Real Uviéu, y personalidaes pernomaes como Camilo Sousa, Paula Rojo, María Cotiello, William Miller, Blanca Romero, Melendi o Quini.
La iniciativa empobinada por Xuncir, lleva grabándose dellos meses dende’l branu, col sofitu d’ente otros, la Xunta pola Defensa de la Llingua.