El Bloque por Asturies ve “increyible” que se cuestione la oficialidá del asturianu nel nuevu Estatutu d’Autonomía

El llíder del Bloque por Asturias (BA), Rafael Palacios, aseguró estos díes en declaraciones a los medios de comunicación, que “nun reconocer la oficialidá del asturianu nel procesu de reforma del Estatutu d’Autonomía d’Asturies sedría un fraude y vulneraría los drechos de los ciudadanos”. Pal Bloque por Asturies ye tamién “increyible”, que “nel sieglu XXI heba ciudadanos d’un país européu lluchando polos sos drechos elementales”.

Según Palacios ye necesario “siguir lluchando escontra la desinformación, escontra los tópicos y escontra l’acción destructora d’una minoría intolerante que tien un odiu irracional a la llingua asturiana y qu’usa tolos medios al so alcance pa impedir la normalidá del idioma”.

Pal Bloque “rómpese’l principiu d’igualdá entre ciudadanos y col restu los ciudadanos del Estáu español”. Según dixo Palacios, “la llucha pola oficialidá ye la única reclamación constante na hestoria recién d’Asturies que sigue ensin resolvese”.

“Queremos un Estatutu que reconoza los mesmos drechos llingüísticos que tienen los ciudadanos d’otres comunidaes”, añadió Palacios, que recordó tamién que “la oficialidá nun quier dicir imponer la llingua a quien nun la quiera falar”.