El Bloque por Asturies debate’l so futuru nun Conceyu Nacional

Dalgo más d’un cientu de compromisarios van xuntase esti sábadu 1 d’abril en Xixón pa celebrar el Conceyu Nacional del Bloque por Asturies. L’asamblea abierta de militantes y simpatizantes de la formación nacionalista habrá valorar l’acción política desenvuelta dende l’entamu de la organización y la so participación nel Pautu de Gobiernu vixente, la so coalición con Izquierda Xunida y el futuru de la organización.

El tramu final de la etapa dientro l’executivu autonómicu y na representación directa en dellos conceyos ye’l momentu escoyíu pola formación de la que ye portavoz nacional Rafael Palacios pa facer balance del trabayu desenvueltu hasta agora y el que’l Bloque allampia llevar a fechu nun futuru. La problemática situación na que s’afaya nel gobiernu la organización nacionalista énte la prósima negociación pola reforma l’Estatutu y respective a les sos relaciones actuales y nun futuru colos sos coaligaos d’IX habrán ser oxetu de discutiniu nesti conceyu que va celebrase esti fin de selmana nun céntricu hotel de Xixón.